Alan G. MacDiarmid

Alan MacDiarmid е еден од пионерите на полето на синтеза и испитување на спроводливи полимери - материјали подобро познати како синтетички метали. Тој работел на хемиски и електрохемиски допинг на полиацетиленот (CH)_x прототип на спроводлив полимер, како и при откривањето на полианилинот - денес еден од најупотребуваните спроводливи полимери.
Неговото интересирање за спроводливите полимери започнало во 1975 година, кога бил запознат со нова форма на полиацетилен од Dr. Hideki Shirakawa од Tokyo Institute of Technology. Постојаната и успешна соработка помеѓу MacDiarmid, Shirakawa и Alan Heeger (од одделот за физика на Универзитетот во Пенсилванија) довело до историско откритие на кондуктивноста кај органските полимери. Почетното откритие и постојаните студии во соработка со Shirakawa резултирало со првиот хемиски допинг на (CH)_x и со детални физички студии со Heeger. Овој органски полимер може да се стимулира и да се доведе до метален режим на пренесување на електрицитет - нов и неочекуван феномен за хемичарите и физичарите.
Овие материјали може да се употребуваат во производството на батерии за повеќекретна употреба, за електромагнетна површинска заштита, антистатичка дисперзија, за заштита од корозија, за флексибилни пластични транзистори и електроди, за производство на електролуминисцентни полимерни дисплеи и др.
Најновите истражувања на MacDiarmid се сконцентрирани околу технолошки најважните спроводливи полимери, како што е полианилинот и неговите олигомери со посебен интерес за изучување на изомерните форми кои може да придонесат многу за висока спроводливост и засилени механички својства кај полианилинот. Тој исто така ги изучува и олигомерите на анилинот како потенцијални сензори за запалливи органските соединенија.
MacDiarmid е роден во Нов Зеланд пред 71 година и по завршувањето на високото образование на Универзитетот во Нов Зеланд, Универзитетот во Висконсин и Универзитетот во Кембриџ тој се вработува на Универзитетот во Пенсилванија каде што сега моментално работи како професор по хемија.
Во изминативе 20 години тој се занимава само со спроводливи полимери (хемиски синтези, допинг, електрохемија, кондуктивност, магнетски и оптички својства на полиацетиленот и полианилинот). Тој е автор и ко-автор на 600 трудови и 20 патенти. Добитник е на многу награди на домашно и светско ниво. Покрај Нобеловата награда (добиена во 2000 година), добитник е на наградата на Американското хемиско друштво во 1999, за хемија на материјали.

Превод: Костова Светлана